अकोला। दि. २८ (प्रतिनिधी)
राष्ट्रीय महामार्ग क्रमांक सहाच्या चौपदरीकरणाच्या कामाला वारंवार ब्रेक लागत आहे. कामाला सुरुवात होण्याच्या तयारीत असताना बांधकामासाठी पाणीच नसल्याने विस्तारीकरणाचे काम थांबले आहे. काटेपूर्णातील अत्यल्प जलसाठा त्यासाठी कारणीभूत आहे. मात्र, जमीन संपादनाची प्रक्रिया अंतिम टप्प्यात असल्याने कामाला विलंब होत असल्याचे सांगण्यात येत आहे.
राष्ट्रीय महामार्ग क्रमांक ६ चे पहिल्या टप्प्यातील चौपदरीकरणाचे काम आटोपले आहे. या महामार्गाच्या चौपदरीकरणाचे काम महाराष्ट्रात नागपूर ते अमरावतीदरम्यान झाले आहे. त्यानंतर बडनेरा ते जळगाव (खां.) दरम्यानच्या दुसर्‍या टप्प्याचे काम होत आहे. राष्ट्रीय महामार्ग प्राधिकरणाने या प्रस्तावाला अंतिम मंजुरी दिली आहे.
मात्र, केंद्रीय पर्यावरण मंत्रालयाची मंजुरी घेणे बंधनकारक आहे. रस्त्याची रुंदी वाढवताना पर्यावरणाला कोणते धोक संभवतात, याची खातरजमा करूनच मंत्रालय पुढील कामांना परवानगी देणार आहे. त्यासाठी राज्याच्या पर्यावरण विभागाने हा प्रस्ताव केंद्रीय पर्यावरण मंत्रालयाला सादर केला आहे. या प्रस्तावाला मंजुरी मिळाल्याची माहिती आहे.
तसेच अमरावती, अकोला, बुलडाणा जिल्ह्यातील जमीन संपादनाची प्रक्रिया सुरू आहे. ज्या भागात जमीन संपादन झाले, तेथून कामाला सुरुवात करता येते. मात्र, बांधकामासाठी पाण्याची समस्या उभी ठाकली आहे. रस्त्याच्या कामासाठी लागणारे पाणी कोठून आणावे, असा प्रश्न राष्ट्रीय महामार्ग प्राधिकरणाला आहे.
काटेपूर्णा प्रकल्पात केवळ १८ टक्के साठा आहे. तो पिण्यासाठीच पुरवावा लागणार आहे. बांधकामाला पाणी कोठून मिळेल, या समस्येवर उत्तर नसल्याने हायवेचे चौपदरीकरण थांबले आहे.